談判專家｜吳鎮宇6.28激罕謝票 劉德華彭秀慧客串演精神病夫妻成熱話

由劉德華監製、邱禮濤執導、兩大影帝劉青雲及吳鎮宇主演嘅電影《談判專家》上映兩星期（截至6月26號），本地票房衝破1500萬，更連續14日高踞香港單日票房冠軍，成績令人鼓舞！絕少謝票嘅鎮宇將喺本周五（28號）聯同戲中客串演綁匪「癲婆」嘅彭秀慧，走到戲院同大家見面！
 
絕少謝票嘅鎮宇將喺本周五（28號）走到戲院同大家見面！

電影有多場令觀眾難忘片段，身兼監製嘅華仔亦有份客串，同彭秀慧飾演一對患有精神病嘅夫婦。戲中二人因兒子被接走而去到社署發難兼挾持人質，青雲同鎮宇飾演嘅談判專家隨即介入事件，箇中劇情原來係導演受自80年代轟動全港嘅「郭亞女事件」啟發而設計，呢場戲亦係鎮宇飾演嘅謝家俊最後離開警隊，投身社工界嘅重要鋪墊。。
 
身兼監製嘅華仔亦有份客串，同彭秀慧飾演一對患有精神病嘅夫婦。

華仔同彭秀慧喺戲中造型突破，前者化上兔唇演躁漢，後者就以慌張失措婦人形象演出，無論角色外型以至演技都令到觀眾非常驚喜。本身係舞台劇劇后彭秀慧形容跟影帝華仔合演夫婦，似獲得一個夢寐以求的機會，表示非常難忘同華仔第一次拖手感覺：「好記得當日拍攝第一個鏡頭就係劉生拖住我過馬路，一拖嘅時候，我就知道：『嗯，得㗎嘞，今日會好順利』因為嗰一下接觸，個夫妻感覺就喺度。然後喺入面拍攝發癲場面時，我哋完全冇討論，即係呢嗰位我會攬你啊，邊度我會推你啊，冇嘅，就係大概知道個行位就去演。」
 
戲中二人因兒子被接走而去到社署發難兼挾持人質，青雲同鎮宇飾演嘅談判專家隨即介入事件。

彭秀慧驚喜觀眾會大讚佢同華仔嘅合作戲份，估唔到一場咁短嘅戲喺成個劇本入面起咗個咁關鍵嘅作用。近年較多時間投放導演工作嘅彭秀慧又再次感謝邱禮濤導演邀演，喚起大眾記得佢嘅演員身份。
 
華仔同彭秀慧喺戲中造型突破，前者化上兔唇演躁漢，後者就以慌張失措婦人形象演出。

兩位演員將基層窘境詮釋到位，更有影評讚華仔客串嘅陳大來係為近年最精彩演出之一，邱禮濤導演亦感謝華仔破格演繹：「當日，劉德華知道我要拍《談判專家》，佢自薦客串，係想為香港電影出一分力，以行動表現出香港電影人互助精神。十分感謝華仔出色演繹，令更多人會關注到社會裡面嘅『陳大來』。」