談判專家｜劉青雲將現身謝票報答觀眾 周文健 楊偉倫配角表現各有精彩

由劉德華監製、邱禮濤執導 、兩大影帝劉青雲同吳鎮宇主演；改編自荷里活神作《冇數講》嘅新戲《談判專家》上映6日，本地票房已經衝破850萬，成績理想。為答謝觀眾支持，今個星期六，青雲將會聯同邱禮濤導演、戲中「人質」3人組包括：Michael、阿卵同顏卓靈一齊現身戲院同觀眾見面！

《談判專家》上映以來後應不俗，主演周六將現身謝票
 
電影劇情刺激緊湊，一眾演員精彩演出更獲觀眾擊掌讚賞，由姜皓文、鄭則仕、苗僑偉等人組成嘅警察團隊，為戲中提供唔少緊張情節；而周文健(Michael)、楊偉倫(阿卵)生鬼有趣嘅表現就為緊張劇場緩和氣氛。飾演人質魯迪嘅阿卵，更因為喺戲中造型突出同劉俊謙喺《九龍城寨之圍城》所演嘅信一「撞樣」，引起網民為佢改名叫「信二」，而阿卵戲中搞笑演技亦被觀眾大讚，成功喺兩位影帝之中搶鏡！
 
至於喺戲中飾演內部調查科警官李俊傑嘅Michael，被卓文偉（劉青雲 飾）喺警局脅持期間，二人互相鬥氣一幕，令觀眾留下深刻印象。

楊偉倫因為髮型同《城寨》嘅劉俊謙相似而被笑稱為「信二」

Michael喺開拍都有花心思同邱導研究角色，亦開心大家鍾意佢嘅表演：「我本人最深刻嘅對白，就係我臨死之前嗌『媽咪』，因為現場啲觀眾笑得好開心！」
 
Michael同青雲識多年，青雲早前喺專訪亦提到今次好開心再同Michael相遇，Michael都有同感：「31年前我哋一齊拍過《七月十四》，之後我哋仲拍過鄭則仕先生監製嘅《運財童子》！佢個英文名亦都係我當時幫佢改嘅，Sean！所以咁多年後好似見返一個失去嘅老朋友咁，咁多年冇合作但係仍然有返我哋以前演戲嘅默契。同劉生做戲好有安全感好有信任，好舒服！我哋以前合作嘅電影都係有喜劇成分喺度，所以好自然呢一部唔多唔少都會有。青雲曾經同我講過『Michael你唔好以為你好笑，只不過見到你嘅忍笑嘅樣我先笑㗎咋！』」

久未演出港片嘅周文健驚喜現身
 
近年回歸影壇嘅Michael，又指電影充滿90年代港產片風格，不過最大分別係以前單機拍攝，現時最少要兼顧三部同時拍攝嘅機器，非常不簡單。
 
而姜皓文呢次要周旋喺青雲、鎮宇兩大影帝之間，佢就形容同兩位鬥戲相當精彩：「同青雲哥有一場落口供嘅戲，同埋另外一場喺臭格入邊佢逃走嘅戲，我都好深刻。另外對我嚟講，鎮宇哥係不嬲好Cool㗎嘛，喺現場就算拍戲都少傾偈，但係今次可以喺戲入邊，直頭兜口兜面對佢呼呼喝喝，過戲癮之餘自己都覺得好過癮。」
 
電影票房節節上升，除咗有謝票活動之外，更即日宣布上映第二週起，購票加送珍藏插畫版海報，數量有限，送完即止！各位影迷萬勿錯過喇！