古天樂堅拒重現經典「拜神舞」 張文傑謝票疑遇狂迷鹹豬手

古天樂、任賢齊率領「城寨三少」林峯、張文傑、胡子彤現身澳門，出席一個戲院開幕儀式，場面墟冚。幾位主演嘅電影《九龍城寨之圍城》不但揚威海外，票房過億，成為近年現象級動作港產片，更登上香港華語電影票房第二位。古仔早前以「龍捲風襲港」做主題，拉大隊現身謝票，引起一陣撲飛熱潮，但大家唔好以為錯過上次就冇下次，事關古仔預告，佢呢位「龍捲風」將會繼續有謝票活動，努力將電影推上香港華語電影票房第一位。
 
隨住電影爆紅，曾經做過歌手兼挑戰唱跳嘅古仔舊作《今期流行》再度成為今期流行熱話，就連日本知名舞團Avantgardey早前都拍片挑戰「古式拜神舞」，大家亦好期待古仔跳埋一份，重現經其一幕。小齊同城寨三少就更大膽，提議搞一個城寨演唱會之餘，佢地更想將拜神舞搬上舞台，三少更推舉小齊出口問古仔意願。不過古仔就堅決拒絕，仲幽默表示：「我上去一拳一拳打落佢地嗰度。叫我上去跳舞，唔好喺度搞事啊！」
 
小齊日前喺成都巡唱度過58歲生日，雖然佢事前就向工作人員交代唔特別慶生，不過最後仍然收到連連驚喜。呢日小齊就解釋話：「蠟燭越插越多有暈，蛋糕越食越多有啲滯。」而佢行程亦忙到阿峯想約食飯都約唔到。完結活動後，小齊就要急急腳飛返台北，想同家人共聚天倫。
 
張文傑（German）日前現身多場謝票活動，雖然German行程緊湊，但面對影迷合照、簽名、握手都絕冇Say no！當日German更大派福利，騷出佢一對爆肌手臂，不過就遇上唔生性嘅大膽狂迷伸手偷襲佢胸肌同用力揸佢手臂，片段亦喺粉絲群組被廣泛瘋傳。呢日German就答得風度，表示自己都係睇返片先知自己被摸，又解釋可能該影迷係見佢污糟咗想幫佢抹乾淨。
 
幾位爆紅嘅城寨演員呢期都經常被影迷稱做「老公」，但只有胡子彤會被叫「BB」，子彤就驚訝表示，當自己好自然回應工矩人員叫佢「BB」時，先發原來無意間自己已經接受咗「BB」呢個稱呼。
 
另外，古仔早前惹上官非被一間娛樂公司主席入稟高等法院，向古仔及其持有嘅公司追討十年前所借出嘅830萬元，對此古仔表示已經交由律師處理，不作回應。