《海關戰線》北京辦首映群星現身 嘉欣難忘再與學友合作

導演邱禮濤率領謝霆鋒、林嘉欣、劉雅瑟、關智斌去到北京出席舉行新戲首映，同大家分享拍攝點滴，霆鋒今次兼任動作指導，喺設計動作方面非常用心，講到其中一場佢同張學友嘅對打戲，霆鋒就話因為知道學友擅長打網球，所以特登設計短棍比佢做武器。

學友喺戲中同霆鋒有打戲，Kenny就要上演鬧霆鋒嘅戲份，Kenny話拍呢場戲感覺好爽，因為平時唔會夠膽鬧霆鋒，同時佢亦大讚霆鋒將為人低調性格壓抑嘅角色詮釋得非常好。至於劉雅瑟就話原本好興奮有霆鋒做武指，但估唔到辛苦程度完全超出預期。

影后嘉欣相隔22年再同霆鋒合作，佢就大讚霆鋒成熟好多，至於今次之所以會難得接拍動作戲，完全係因為被劇本同對手吸引，除咗可以第三次同學友合作，仲可以同鎮宇對戲，相當過癮。

至於近日有外界質疑，電影對於海關工作嘅描寫以及動作戲嘅呈現太過浮誇，導演邱禮濤就話，海關工作唔止檢查行李同逃漏稅，其實海關都係武裝部隊，香港海關過去亦都曾經破獲走私軍火案，即管動作部分有小小誇大，不過案件原型都係真有其事。