文詠珊中門大開亮相上海國際電影節 擁億萬票房最想挑戰科幻片

每年嘅上海國際電影節都會舉行大大小小唔同主題嘅活動，以科幻為主題嘅電影英雄之夜，就向一班為中國科幻電影努力貢獻嘅電影工作者致敬。除咗幕後人員，唔少演員呢日都盛裝出席，包括 文詠珊 蘇有朋、江疏影、黃覺、黃軒、榮梓杉、阿雲嘎等等。

Janice Man以一身紅色晚裝亮相，中門大開兼騷長腿，非常吸睛。上年憑驚悚片《消失的她》成為億萬票房女星，大家都好期待佢嘅下一步作品會係咩類型，Janice就話覺得科幻係一個好新鮮嘅題材，自己都希望可以嘗試，另外佢仲想挑戰演喜劇。

形象斯文嘅江疏影同樣話希望可以嘗試唔同類型嘅角色，拓展自己嘅戲路，佢話自己對題材不設限，最重要係可以引起自身共鳴，咁先可以更加投入。

舞台劇演員阿雲嘎近期轉換跑道拍電影，雖然都係做戲，但佢就話感覺好唔同，因為電影有好多特寫鏡頭，而舞台劇就要全程keep住高能量，確保最後一行嘅觀眾都可以感受到自己嘅呼吸。

實力派演員黃軒成日喺影視作品中扮演唔同角色，而私底下佢都好識得自我放鬆，最大嘅興趣就係寫書法，另外佢都好享受徒步旅行，仲話未來希望可以成為一個旅遊達人。