50歲吳彥祖上海電影節現身時尚晚宴 搣甩容貌崩壞標籤重現男神氣場

上海國際電影節正如火如荼進行中，除咗電影本身，年年都有唔同嘅晚宴喺期間舉辦，呢晚吳彥祖（Daniel）就聯同內地娛樂公司，聯手打造一場以老友記為主題嘅時尚晚宴。

今年9月就滿50歲嘅Daniel近年外貌引起唔少討論，有指佢外型崩壞，容貌比起同齡男星更顯蒼老，又話佢髮線越來越高，似乎有脫髮危機，不過呢日見Daniel現身，一身smart casual造型，依然好有男神風範，佢預告嚟緊喺影音平台會有新搞作：「我們想到一個好玩的事前就是，回到我讀大學的東西就是設計，因為我很多時候在很多不同的國家看建築、看設計、看家具，都會跟其他觀眾分享，所以主要會有一個教育的部分在裡面。」

同場仲有吳建豪、包貝爾、嚴屹寬、信等等，大家都好開心可以趁活動見返啲老朋友。吳建豪話自己當初收到邀請，但因為工作關係唔確定能否出席，不過因為好期待可以同老朋友聚舊，所以特登排開其他工作，飛過海同大家開心聚一晚。