吳彥祖於9歲攝影師鏡頭下 回復巔峰神顏

定居美國、現年49歲嘅吳彥祖，之前一直畀網民話佢嘅容顏不復當年，不過最近佢幫內地9歲天才攝影師笙笙擔任model，喺對方鏡頭下嘅吳彥祖，唔只回復返巔峰時期嘅神顏，仲多咗一份童趣添！

當吳彥祖聽笙笙講解要點樣擺pose時，佢話自己同過逾千位攝影師合作，但笙笙絕對係最特別嘅一個；而當笙笙換相機再為佢影相時，吳彥祖一眼就睇出對方拎住嘅相機型號，仲話因為自己中學嘅時代有影開黑白相，當時仲係自己影完自己沖曬㗎！

而當笙笙拎出貼紙作為道具，想貼喺吳彥祖臉上再影相時，笙笙發現自己帶嚟嘅貼紙似乎太大張，見到笙笙猶豫，吳彥祖就溫柔咁同佢講：「別怕，無所謂。」笙笙聽完就話自己要勇敢啲將貼紙貼上去時，吳彥祖再鼓勵笙笙：「對，勇敢一點，做甚麼事情都要勇敢一點，你知道嗎？」喺影完相後，笙笙幫佢撕走貼紙時，吳彥祖再次好爸爸上身，叫對方大膽撕自己唔會痛，相當窩心。

9歲嘅笙笙被喻為上海最細嘅天才攝影師，佢曾經為梁朝偉、周迅、水行俠Jason Momoa、劉德華、彭于晏等巨星影宣傳照。