政府授勳劉德華再獲星章表揚 胡楓受訪笑意難掩自謙不足

政府公佈新一份頒授勳銜名單，502位獲嘉獎人士當中，包括幾位大家熟悉嘅演藝界人物。劉德華 胡楓 同 老倌兼八和主席 龍貫天 今年都獲政府嘉許。

入行超過40年嘅華仔，年前已曾獲政府勳章同獎章表揚，今年再獲授銀紫荊星章嘅佢，就回應指多謝各界對自己嘅肯定，亦會繼續本份以唔同方式關心同回饋社會。

同樣從影多年，已逾90歲仍精神甚佳嘅 胡楓 唔止係唔少巨星嘅契爺，亦廣受圈中後輩尊敬，政府亦向修哥頒授銅紫荊星章以作表揚，佢接受我哋電話訪問時，就指自己非常開心，開心之餘亦感到慚愧，因為自覺公益工作不足。早前已收到禮賓府通知喜訊嘅佢，又已獲大家各式祝賀，好友紛紛設宴慶祝。另外，身為八和會館主席嘅粵劇名伶龍貫天亦獲頒授銅紫荊星章。