江美儀分享真實奇遇事件 學懂改變心態情緒更覺平靜

江美儀與塔羅占卜師羅泳嫻作客梁思浩主持嘅節目《直播靈接觸》，美儀姐分享咗一件鮮為人知嘅真人真事，佢話試過有一次喺內地演出舞台劇後，突然勁唔舒服，天旋地轉，仲要瞓喺車度返酒店，於是第二日佢返回會場，就同空氣講，承諾每日都會諗五篇大悲咒，美儀話唸完已經覺得個人舒服咗好多；到晚上表演時，其中一幕係話佢會甩個假髮，點知呢個時候，個假髮真係甩咗出嚟，而台下嘅觀眾亦都睇得好開心，美儀覺得一切配合得天衣無縫，覺得好似係「朋友仔」特登幫助佢。

修行多年嘅美儀，經常都會夢見已故先人或者陌生人嘅報夢，佢亦會盡力伸出援手幫忙，原來美儀話佢好細個時，已經有呢種經歷，不過，佢話能唔能夠幫到佢哋，都要視乎自己嘅能量，如果能量唔夠嘅話，自己都會覺得不適，思浩話好認同美儀講「心態改變一切都會改變」，例如落雨，有啲人就會怨天尤人，但係如果心態改變一下，視落雨為正常現象，認為落雨可以滋潤飽受旱災困擾嘅地方，咁樣改變心態後，人都會變得平靜，情緒亦唔會有太大起伏。