蕭芳芳為護苗基金罕有現身 暢談近況兼明年七公主60周年

蕭芳芳受耳鳴困擾，近年已經甚少露面，但一直堅持關心未成年人士免於遭受性侵事宜，芳芳姐以「護苗基金」會長身份現身立法會，向黎棟國議員遞交「強制舉報虐待兒童條例草案」意見書。

芳芳姐喺議會上親民風趣，不時向黎議員敬禮，原因係2011年，時任保安局副局長嘅黎議員曾到訪護苗開會，芳芳姐話當刻黎議員畀佢感覺好好，所以呢個敬禮動作就變成好好嘅回憶。
見到芳芳姐容光煥髮，佢透露平日都有做氣功，但每次外出後都要喺床休息幾日，因為耳鳴會嚴重咗。

對於七公主明年係組成60周年，芳芳姐話未有諗點慶祝，當知道薛家燕提議外遊，佢就話自己去唔到，因為耳鳴關係坐唔到飛機，幽默嘅芳芳姐話若果慶祝都會閉門搞。

細女早前喺香港首辦畫展，芳芳姐低調現身，佢解釋因為唔想囡囡活喺自己之下，所以唔會參與囡囡活動，而囡囡都會明白佢咁做原因。