黃洛妍與粉絲提前慶祝27歲生日 與餅印妹妹出街曾被誤認兩母女

今日（26號）就係黃洛妍（Janees）27歲生日，Janees日前聯同一眾歌迷提前慶祝生日，《聲夢》好友冼靖峰、趙小婷到場祝賀。好錫Fans嘅Janees唔只一展身手表演小提琴演奏，啱啱拍完劇集《麻雀樂團》嘅佢更趁空檔苦練2星期鋼琴，喺呢日表演自彈自唱作為送畀歌迷驚喜。

一眾歌迷好有壽星女心，為佢送上小提琴造型蛋糕，Janees大讚蛋糕做得仔細！講到生日願望，Janees就話：「希望大家身體健康。希望自己快啲出新歌。因為一切都喺籌備當中，亦知道大家等緊，所以希望大家再耐心等待一下。」

喺生日會上，同Janees生得餅印一樣嘅妹妹黃千如有現身。Janees自爆喺十幾歲時帶阿妹出街時，曾被路人誤以為二人係母女，非常搞笑。對於即將推出《聲夢傳奇3》，Janees就話唔介意妹妹參加，但阿妹表示暫時未諗到咁遠。