星光路上丨阮兆祥以全能藝人志偉哥為目標 讚思捷係技術型扮嘢高手

阮兆祥（祥師兄）呢日接受TVB娛樂新聞台節目《星光路上》訪問，與主播潘盈慧講吓入行經歷，當年祥師兄參加歌唱比賽投身娛樂圈，佢坦言當時有啲徬徨，只有500元月薪，有感始終要生活，祥師兄一度搵過一份朝九晚五，於銀行做櫃檯接待員工作，由於工種比較枯燥，最後祥師兄辭職冇撈。

祥師兄覺得自己好享受做娛樂圈呢行，有諗過唔做歌手嘅話，佢希望好似曾志偉咁成為一位全能藝人，以志偉哥為目標，為咗增加公眾緣，祥師兄決定入TVB試鏡做音樂主持，與拍檔梁榮忠主持《Sunday新地帶》同《勁歌金曲》，有機會做大型Live騷，與唔同歌手走得更近。

後來祥師兄主動去EYT「木人巷」試吓，佢開始做綜藝節目，展開扮嘢生涯，祥師兄最近同李思捷及王祖藍主持《福祿壽訓練學院》，佢同思捷「極速」還原熱爆新聞人物何伯與新何太，帶出「鵝伯鵝太」忘年戀事，祥師兄讚李思捷係技術型扮嘢高手，能夠將一個人細微嘅嘢去展現出嚟，而祥師兄由細到大睇鵬哥同燦神搞笑，就係捉住某個人嘅特質，將其卡通化再放大，令觀眾捧腹大笑，祥師兄覺得喺搞笑裡面，自己擅長去做呢樣嘢，而祥師兄主持《福祿壽訓練學院》，佢都希望學員們日後條路易行啲，期望有人接班。