福祿壽訓練學院終極對決｜10強見面會各展所長拉票 阮兆祥籲放輕得失享受舞台

TVB扮嘢真人騷《福祿壽訓練學院終極對決》將於6月30號舉行，呢日導師阮兆祥、李思捷，聯同主持郭珮文、陳懿德及9位新鮮出爐學員黃建東、趙頌宜、陳柏曦、關嘉敏、陶大衛、葉泓聲、周百恩、彭建豪、林樂熙現身見面會，而吳兆麟因有工作在身未能到場。

9位新鮮出爐學員為30號星期日決賽造勢，化身唔同嘅造型即場大Show扮嘢天份拉票，好似趙頌宜同彭建豪分別再次化身郭富城同蔡琴載歌載舞，林樂熙公開表演最擅長嘅模仿聲音。

經過連串表演後，最終祖藍嘅學員新會華Dee陳柏曦得票最高，先拔頭籌奪得「今個新地扮嘢王」名銜，佢話會平常心對待比賽。而星爺上身嘅思捷以及祥仔，就即場公布節目佳績，見到節目咁受觀眾歡迎，學員們唔敢怠慢，葉泓聲近日為令自己表演更好，感到好大壓力，黃建東直言近日冇覺好瞓，絞盡腦汁去思考扮咩再玩突破。

祥師兄帶領嘅Team Fuk，有六位學員成功殺入決賽，令祥仔覺得好恩惠，到咗呢個階段，名次已經唔係最重要，佢會視30號係一個大型派對，希望大家享受舞台、做好個騷，唔好太過計較得失，學員陶大衛完全接收導師嘅用心良苦。