福祿壽訓練學院丨荃加福祿壽相隔14年合體組女團 大熱陶大衛玩一人香港先生

《福祿壽訓練學院終極對決》今個星期日（30號）晚上舉行，阿姐汪明荃擔任壓軸嘉賓，「荃加福祿壽」相隔14年再度合體，呢日阿姐、主持李思捷、王祖藍、阮兆祥同10強學員進行拜神儀式。

祖藍感謝阿姐大駕光臨，阿姐指同「福祿壽」原本就係一體，透露今次同「福祿壽」唱一首歌，祥師兄話佢哋屆時會扮阿姐造型亮相，啲化妝同髮型要跟足阿姐，笑指呢個係四人女子組合；講到「福祿壽」帶領學員進入最後關頭，佢哋好期待學員正式畢業。

祖藍感謝阿姐當年帶住佢哋三個，而家「福祿壽」就學番阿姐咁帶吓啲新人，阿姐讚呢個係傳承，祥師兄同祖藍覺得要學習阿姐嘅專業，同阿姐工作可以準時開工、準時收工，祖藍就爆竟然有學員遲大到。

講到「荃加福祿壽」再合作，阿姐話叫啲高層諗吓，指一指身旁嘅祖藍係「高層」，祖藍馬上否認：「搵總經理！搵總經理！」而思捷提議搞「荃家福祿壽」，要搵埋家英哥，阿姐笑稱呢個任務好難！

10強學員傾力迎戰，將喺舞台各展所長，付出好多心血同精神去準備，爭奪「終極扮嘢王」寶座，大熱陶大衛玩一人香港先生，而黃建東坦言仲改緊隻歌未知唱唔唱到，周百恩覺得最重要係一齊玩，認為盡咗力就得，陳柏曦就直言想自己贏。