張馳豪剝衫換呔man爆騷肌 曬到變乳豬獲粉絲激讚夠貼地

參加《聲夢傳奇》出道嘅張馳豪(Aska)近年喺歌唱事業發展都算有唔錯成績，近日仲有份出演劇集《反黑英雄》飾演PTU，為咗拍劇同早前推出跳唱歌曲，Aska事前經過一段時間勤力操fit，所以佢上月公開演出時，一除衫就見到佢驚人嘅成績，練得一身健碩身型令人尖叫。

有副咁好嘅Body，得閒派吓福利都唔過份啦。不過日前Aska就好黑仔，喺電台工作完後竟然遇上自己座駕爆呔，喺烈日當空三十幾度高溫下曝曬，仲要親自換呔，呢個時候第一件事梗係除衫消暑大於一切啦。

Aska上載咗自己換呔過程到社交平台，見佢全身出晒汗雖然好man，但就有啲手忙腳亂，仲話自己曾經喺美國時試過相同情況，但因為每架車嘅車積都唔同，見佢花咗好一段時間先處理到條爆咗嘅呔，片中見到有兩位保安先後出現想幫忙，但Aska就堅持自己完成，搞咗一輪終於可以再出發，由於時間緊迫，Aska都未能顧及自己儀態，衫都未得閒著就登上座駕，趕往下一個地方，之後佢更影低自己紅卜卜嘅背部話「曬到成隻乳豬咁。」但都覺得係個好好體驗。

雖然呢場陽光遊戲有啲辛苦，但事後唔少粉絲睇到Aska咁貼地嘅行為都激讚佢叻仔、EQ高遇到呢個情況都冇發脾氣、又笑指爆呔事小，爆衫事大，而且仲有好多網民話下次呢個情況可以Call佢哋幫忙。