孖女神相澤南拍獨食好西 吳業坤難為周奕瑋介紹另一半

曾一齊主持節目《#好掛住日本》嘅吳業坤、周奕瑋，之前喺日本大阪相遇，兩人更上載跳舞片段，原來佢哋呢次係各自拍飲食節目，坤哥呢次拍《獨食好西》仲有機會同退役AV女優相澤南合作，有女神相伴，坤哥都話相當緊張，但之後發覺對方非常有禮，又樂於助人，係不拘小節嘅女生，而相澤南都大讚坤哥好健談，亦都好識照顧人。

同美女一齊做嘢，坤哥坦言太太有向佢撒下嬌，不過最終太太都好體諒，知道坤哥只係工作需要啫。講到拍攝過程最難忘嘅事，除咗係去奈良餵鹿仔之外，光顧燒鳥店(串燒雞店)以及食蟹，都令佢哋印象深刻，坤哥話工作過後，都想約埋Jarvis 同埋王敏奕一齊飲番杯放鬆下，可惜兩位因為工作太忙，而未能成事，坤哥仲講笑話，想介紹對象比單身嘅Jarvis都有難度呀。