莊思敏留言引發楊明壞人風波 羅霖眼疾或需開刀最驚留疤痕

羅霖 向海嵐 文頌嫻 胡曦文 湯寶如 嚴淑明 等 現身一個晚宴，當中雲集多位凍齡美魔女，晚宴邀請到 肥媽Maria Cordero 同 賈思樂 獻唱，兩人獻唱懷舊金曲令觀眾聽得投入。

莊思敏 同細妹 莊思華 都有一齊現身，日前Jacquelin喺社交平台出Post疑似暗示有壞人黐住屋企人，外間將矛頭直指細妹莊思明(Lisa)嘅男友楊明，不過Jacquelin就話成件事係一個天大嘅誤會，澄清並無此事，仲話若果真係發生喺佢身上，佢一定會開名，唔會暗示。Jacquelin指當晚純粹睇到網上新聞及睇劇後瞓唔著，有感而發寫咗兩句出Po，已經特意揀咗一個較少人追蹤嘅社交平台發布，估唔到大家反應咁大，下次會小心啲。

呢日見羅霖右眼有啲紅腫，原來佢近排受淚管堵塞困擾，但因工作太忙，未有即時睇醫生，到一星期後見情況仲未有改善去求醫，至今已經三星期，若持續打針、食藥唔消腫，有可能要做手術治理，令向來貪靚嘅羅霖最擔心會留有疤痕。

阿Anne近期參演音樂劇飾演校長，因為角色需要好嚴格好惡，同真實嘅佢完全相反，而且仲要唱歌同Rap，佢事前雖然都花咗一段時間揣摩角色，但仍然好有壓力。此外，又出書又喺網上分享美容智識嘅嚴淑明就公開咗個收毛孔秘訣畀大家，仲話萬試萬靈。