賈思樂音樂結緣好知音 與廖安麗多年友誼深厚不變

賈思樂（Louise）入行將近50年，喺圈中結下無數深刻友誼，而廖安麗（Annie）亦係不能忽略嘅一位！Louise回憶最初同Annie相識過程，一切由同露雲娜合作音樂節目《輕輕鬆鬆半個鐘》講起。當時Louise需要一位和音歌手，但TVB當時並唔流行請專業和音歌手，所以就叫兩位喺訓練班嘅同學之中揀人，其中一位就係Annie喇！Annie雖然並唔係一眾同學之中唱功最好，但佢有一顆積極向上，努力學習嘅心，因此而吸引Louise。最終Annie嘅進步亦被Louise看在眼內，令佢相信自己並冇揀錯人。 

賈思樂入行將近50年，喺圈中結下無數深刻友誼，而廖安麗亦係不能忽略嘅一位！

Louise同Annie因唔少共通點而成為一對真正朋友，甚至當社交圈子變大嘅時候，Annie就擔任娛樂組組長工作，毫不計較時常墊支。 無論係工作、友誼，Louise都係Annie嘅一個最佳拍檔，就連同葉青霖嘅愛情，都係由Louise擔任媒人。Louise分享：「當年我邀請葉青霖拍攝我嘅唱片封套，而佢需要一位女Model，於是我介紹Annie畀佢。佢覺得Annie化妝後非常靚，對Annie非常著迷。」就係呢次合作後，葉青霖同Annie變得關係越來越親密，最後拉埋天窗，兩位仲封咗一封大利是畀Louise添！ 

Louise同Annie因唔少共通點而成為一對真正朋友，甚至當社交圈子變大嘅時候，Annie就擔任娛樂組組長工作。

回憶當時婚禮，Louise負責做伴郎，狄寶娜摩亞（Deborah Moore）做伴娘。當時TVB非常痛錫Annie，連《歡樂今宵》都有延長直播婚禮，好似做一個大型節目咁。至於Annie對婚禮著裝都好有要求，Louise就話：「佢作為新娘要著得與眾不同，甚至連伴郎、伴娘嘅裝扮都要特別出眾。我著得非常奇特，但佢堅持，所以我就心諗『好啦，好朋友結婚大事，我著咩都願意』。」 Annie喺葉青霖決定出家後亦開始慈善之路，創立《身前行動》鼓勵人離世後捐贈器官去延續他人生命。最初Louise好抗拒簽器官捐贈卡，但喺Annie勸說後都改變諗法。而Louise即將舉行嘅入行50周年演唱會嘅所得收益，全數捐贈畀《身前行動》，全力支持老友。

賈思樂與廖安麗相識多年友情不變。二人仍會不時見面聚舊。