柯震東曬出與多賢及鄭永振合照 惹客串韓版《那些年》疑雲

電影《那些年，我們一起追的女孩》唔只令當時仲係新演員嘅柯震東出道即巔峰，更令扮演沈佳宜嘅陳妍希成為國民校花，佢哋喺戲中嘅約會地點，亦一度成為情侶必到嘅打卡熱點；而當年勁收12億台幣嘅《那些年》，更曾改編成日本及泰國版本。
柯震東曬出與韓版《那些年》演員鄭振永及多賢嘅合照。陳妍希同柯震東因為電影《那些年，我們一起追的女孩》而走紅。
最近韓國亦落實翻拍《那些年》，更搵嚟TWICE嘅多賢以及鄭振永，飾演韓版沈佳宜同柯景騰，消息一出即引嚟網民熱烈討論。
韓版《那些年》搵嚟TWICE嘅多賢以及鄭振永演出。
而身為原版柯景騰嘅飾演者柯震東，近日就係社交平台嘅限時動態post出同多賢以及鄭振永嘅合照，仲喺相度特別標明「韓版柯景騰」同「韓版沈佳宜」，唔少網民睇到三人嘅合照後，就猜測柯震東係咪會喺韓國版嘅《那些年》入面露面。
當日仲有宋芸樺同蔡凡熙。
但原來早前柯震東同宋芸樺、蔡凡熙、九把刀等去到韓國為電影《請問，還有哪裡需要加強》出席「第28屆富川國際奇幻影展（BIFAN 2024）」開幕禮，眾人就趁機同多賢、鄭振永飯聚，除咗柯震東曬出與2人合照外，蔡凡熙亦喺限時動態曬出佢同柯震東、宋芸樺、多賢及鄭振永嘅合照。