柯震東為角色努力增肥 自揭突然學廣東話原因

柯震東呢日現身台北出席代言活動，距離金鐘獎舉行仲有大半個月時間，首次入圍角逐迷你劇集最佳男配角嘅佢，就話有得入圍就已經好開心，佢又話金鐘獎對佢嚟講係一個好陌生嘅領域，所以都好期待到時嘅流程會係點。

柯震東今年首度入圍金鐘獎競逐男配角
完成金鐘後，柯震東就要投入新劇，由於要為角色增肥，佢笑言擔心自己呢個年紀肥咗就好難瘦得返。至於講到今年主力都係喺電視劇上，幾時先會回歸電影？柯震東就話係冇電影搵佢拍，自己都希望拍電影，因為呢個領域佢比較熟悉。
佢又話為增值自己而正勤學粵、英、韓語

最近柯震東喺社交平台召集大家教佢講廣東話，問到係咪為去香港拍戲做準備？佢話只係做定準備，自己當然希望有機會去香港拍戲，同時亦係為同朋友好好交流，柯震東又透露自己除咗學廣東話外，仲有學緊英文同韓文，希望有一日可以用到。
早前佢被冒認詐騙，事後發聲明指與事件無關

網上經常會出現有人冒充藝人嚟進行詐騙，柯震東亦係受害者之一，早前佢就此發出聲明，仲話自己都係第一次遇到咁有組織嘅集團式詐騙。