阮浩棕謙虛面對奪男飛躍獎呼聲 衛詩雅慶佳節計劃夠獨特

阮浩棕  丁子朗 朱敏瀚  衛詩雅（Michelle）日前出席一個馬拉松活動，下個月就係馬拉松賽事舉行嘅大日子，作為跑步發燒友嘅Nicholas、朱仔、Michelle亦積極備戰。最近天氣寒冷，Nicholas都話因為太凍會令肌肉變硬，會影響備戰進度，所以一定要做好熱身先可以跑。朱仔就因為喺室內練習，所以未被天氣影響太多，加上賽事會喺港珠澳大橋進行，跑起嚟唔會太難，而且仲可以邊跑邊睇風景分散注意力。 

阮浩棕、丁子朗、朱敏瀚同衛詩雅等參與馬拉松宣傳活動

《萬千星輝頒獎典禮2024》十強名單日前出爐，有份角逐男飛躍獎項嘅Nicholas被睇好係奪獎大熱。曾經拎過男飛躍嘅丁丁同朱仔都對得獎一刻嘅情境非常難忘，朱仔提醒Nicholas講感言時唔好太緊張，而丁丁就話最重要少理工作人員嘅催促，自己好好講感受就得。至於對於得獎有幾大信心，Nicholas就話一切平常心，而且對手強勁，所以個個得獎機會都大。Nicholas又感恩劇集《異空感應》嘅播出造就自己有入圍機會，亦好感激劇組。

阿Nic入圍今年飛躍男演員，丁丁同朱仔就分享入圍感受

 Michelle主演嘅新戲《破・地獄》唔只打破香港票房紀錄，喺多地亦收到好好成績。Michelle就話已經計劃好同未婚夫一齊悄悄地用一次「觀眾」身份入戲院欣賞一次套戲，順便慶祝聖誕。

Michelle打算同未婚夫偷偷入場欣賞主演嘅話題電影