古淖文後援會自發搞聚會 粉絲不斷暴增險逼爆場

《中年好聲音2》冠軍 古淖文 8月就會返澳門舉行兩場演唱會，亦係佢首次個唱。German好快就會閉關準備，呢日佢嘅Fans Club自發搞大型聚會，仲預祝German演唱會成功，《中聲2》嘅戰友 劉威煌 甘永傑 王玥 等都有現身支持。

German本來只係打算搞一次小型親密聚會，但係估唔到越來越多人報名，最後更有300多人參加，搞到German都好驚喜，仲要催促截人數。佢為咗報答古粉嘅熱烈支持，仲安排咗特別演出，同結他手以Acoustic形式獻唱，多首節目中未有獻唱過嘅歌曲，簡簡單單令歌迷感受自己嘅歌聲，難怪唔少古粉都心心眼望實German喇。

為咗支持偶像喺舞台上發光發亮，唔少古粉都相當關注German嘅健康，不時送去水丸，同護心保健品，希望佢有個好Fit嘅身形上鏡，同時可以提升佢嘅睡眠質素。