車婉婉主持《中聲3》預睇幾百條海選片 古淖文積極為澳門個唱備戰

古淖文（German）同 車婉婉 呢日聯手舉行音樂會，二人首度合唱《心仍是冷》，現場粉絲大飽耳福，German感謝前輩車婉婉好似「大家姐」咁一直送暖，以眼神安撫《中聲》參加者，令大家感到安心。

《中年好聲音3》經已接受報名，車婉婉呼籲有意者立即報名，感受呢份追夢嘅熱血，第三季有星馬、大灣區海選，車婉婉亦鼓勵朋友去參賽，指自己喺8月頭就要入廠準備，所以需要提前睇參賽者幾百條海選片，又要記參賽者啲名、參賽歌曲、了解參賽者嘅故事等，必須整裝待發。

身旁嘅German亦相當忙碌，目前要積極為澳門個唱演出備戰，佢已選好歌單，忙完手頭上嘅工作，German就要返澳門練歌排舞，努力繼續操肌。