梁釗峰拍MV遇上惡劣天氣 眼見工作人員淋雨救器材感內疚

梁釗峰為新歌拍攝MV，可惜中途遇上狂風暴雨，製作團隊搭建帳篷都被吹倒，令現場一遍混亂，工作人員忙於收拾現場物品同時，又叮囑釗峰先上車避雨。但係見到成班工作人員淋濕，喺車上等候嘅釗峰都好憂心同無奈，佢話因為唔知使唔使再補拍，所以要保住個妝唔好被雨水整濕，眼見工作人員全身濕透去保護機器同物品，佢都覺得愛莫能助，內心非常抱歉。

最終因為天氣惡劣，拍攝被迫腰斬，好彩翌日天公造美，釗峰同工作人員又可以開工拍攝，佢話新歌內容好輕鬆，主要想帶出陪伴感覺，今次拍攝就搵嚟一隻狗狗陪佢。另外，釗峰亦首次為新歌宣傳照題字，佢話：「5個字我花咗兩個幾鐘，不斷修改再寫，出到街大家唔好笑，係肥大啲但Cute Cute嘅，希望大家感受到我嘅誠意。」