陳凱琳計劃一家五口旅行 黎諾懿為結婚十周年煩惱

小朋友正式放暑假，相信一眾父母都要為咗安排暑假活動而忙到無停手，為人父母嘅 陳凱琳 同 黎諾懿 就暫時放低佢哋嘅寶貝仔，一齊參與慈善活動，為病童籌款送暖。

Grace平日都有灌輸助人心態畀仔仔，等佢哋明白有人係需要其他人幫助。講到今年暑假，Grace話仔仔上緊暑期班，到8月佢同老公 鄭嘉穎 就會帶埋三位仔仔，首次一家五口去旅行，佢話會揀啲陽光與海灘嘅地方輕鬆玩吓。

諾懿就話為咗安排小春雞暑假玩乜，諗到多咗皺紋，因為仔仔每日都問去邊度玩，黃昏就會拎架單車出嚟話要去踩，不過咁都未夠煩，因為今年係佢同太太結婚十周年，佢直認諗點慶祝仲煩惱過安排暑假玩乜，而家構思二人世界去玩，但心知太太未必放低一對寶貝仔。