StarTalk丨莊錠欣做好與CLC合體準備 期待推出更多廣東歌

去過韓國發展、近年回歸華語市場出歌嘅 莊錠欣Elkie ，呢日就嚟到《StarTalk》接受 許文軒 訪問。提到2021年退出韓團CLC一事，Elkie直言有覺得可惜，因為佢同成員們嘅關係都好好，所以即使而家係各自發展，但大家都仲有keep住聯絡同見面，亦會互相支持大家，Elkie指而家見到大家可以推出自己鍾意嘅音樂，都會好戥對方開心呀。

天下無不散之筵席，Elkie亦同fans講過，之前同公司完約，但唔代表佢哋唔會再一齊，可能之後有機會的話，佢哋會自己組一次合體，Elkie仲話自己喺合體呢方面已經準備好，因為以前都自己都有寫咗啲歌畀CLC，但因為而家大家都喺唔同公司，所以行政上嘅嘢就要麻煩同事喇。
Elkie話自己準備好同CLC再之合體。
提到早前推出嘅首張實體華語專輯，當中亦有Elkie自己創作嘅作品，佢話自己作嘅歌係最能表達自己心入面嘅情感，同埋會更有自己嘅個人特色。新歌《沒有你的未來》同Becky共同作曲，Elkie指對方係首位教自己作曲嘅老師，佢話Becky就好似一位媽媽咁成日鼓勵自己。Elkie又表示因為自己唔係學專業樂理出身，所以有時作曲會變成自由發揮，但亦因為咁令佢嘅創作打破咗傳統嘅作曲模式。
Elkie分享《沒有你的未來》廣東話版嘅誕生原因。
童星出身嘅Elkie，早前曾翻唱自己有份演出嘅劇集《On Call 36小時II》嘅主題曲，當時佢仲製作埋一個小MV，唔少fans都狂讚，亦因為呢次翻唱，令Elkie萌生唱廣東歌嘅念頭，直到早前出席小學同學聚會時，有同學講起自己業餘時會填歌詞，就係咁就促成《沒有你的未來》嘅廣東話版誕生，而收錄喺專輯嘅版本，仲係Elkie一take過嘅版本嚟㗎！

由於今次嘅廣東歌深受fans歡迎，所以Elkie話自己都對出廣東歌嘅信心增加咗，嚟緊亦想出多啲唔同風格嘅廣東歌呀。