劉家豪榮休宴獲群星到賀 曾志偉指放假後鳥倦知還

金牌監製劉家豪早前宣布榮休，獲一眾台前幕後包括馬國明、林夏薇、陳展鵬、張頴康、黃智賢、蔣祖曼、謝雪心、郭柏姸、朱敏瀚、羅天宇、何依婷同莊思敏等過百人出席榮休宴兼預祝生日，而總經理曾志偉出席完工作飯局後就趕赴榮休宴，志偉話家豪哥獲公司人人敬重，又為演藝圈電視界貢獻最大嘅監製，所以點樣都要趕嚟出席。志偉指家豪哥話做咗50年，係時候要放假休息下同太太梅小青去度蜜月，不過志偉就笑住叫對方唔好玩咁多，要鳥倦知還，因為大家都掛住佢等佢再返嚟，身旁嘅樂易玲小姐都認同。監製鍾澍佳代表幕後送上金牌祝賀，而陳展鵬同林夏薇等送上一個花盡心思嘅蛋糕。
劉家豪榮休宴。
家豪哥50年工作生涯，佢話好幸運遇過好似周星馳咁嘅神級演員，仲有《溏心風暴》同《逆天奇案》兩個系列嘅一眾演員。林夏薇專程喺橫店趕返港出席，原因佢好榮幸擔任家豪哥監製最後三部作品嘅女主角，佢都話冇諗過細過睇家豪哥嘅劇集，而家做到佢劇中嘅女主角。另外，佢都好開心同舊同學陳曉圓夢，終於喺工作上合作。
曾志偉亦有出席劉家豪榮休宴。
劇集《回到三國》最近喺深夜時段播出，阿康都話好感激家豪哥當年畀佢飾演到一個代表作嘅角色，嚟到呢刻佢都未相信家豪哥榮休，仲想一齊創作更多好角色。馬明都話好多謝家豪哥同小青姐一直以嚟畀咗好多機會佢，所以特別開心見到家豪哥夫婦榮休，咁多人戥佢哋開心。早前佢同太太湯洛雯一齊飛到泰國蘇梅島出席朋友婚禮，馬明都話勾起好多舊年結婚回憶。Joman同阿Ben都讚家豪哥處事認真，喺佢身上獲益良多。