李幸倪以情緒勒索為題辦作品展 以「指甲」帶出投稿人與媽媽關係

李幸倪Gin Lee早前推出以情緒勒索為主題嘅歌曲，希望藉此引起社會對情緒勒索嘅關注，由於歌曲推出後Gin Lee收到唔少歌迷分享嘅親身經歷，所以令佢萌生以呢啲故事舉辦展覽嘅念頭。
Gin Lee以策展人身份舉辦《The Art of Rising Above Gaslighting Experiences: The Exhibition》展覽。
呢日Gin Lee就以策展人身份舉辦《The Art of Rising Above Gaslighting Experiences: The Exhibition》展覽，佢邀請咗正位藝術工作者：歌手鄧小巧、Kendy Suen、當代插畫家Mickco Chan、多媒介創作藝術家Ann Wong 同 時裝設計師Victor Chan，以公開徵集嘅情緒勒索故事，創作出六件作品。
Gin Lee以指甲表達投稿人同媽媽嘅關係。
當中Gin Lee嘅作品係透過「指甲」帶出訊息，而創作靈感係嚟自一位投稿人同媽媽嘅關係，佢話：「佢心中好多不安同埋恐懼，好驚失去佢媽媽，所以唔小心講咗一啲好傷人嘅一啲說話，傷害咗有病嘅媽媽，我睇完之後覺得好感觸。」

Gin Lee指成個作品單係構思都花咗一個月時間，佢指自己腦海中有好多唔同嘅情景出現過，最終揀咗用黑色長尖指甲嚟表達：「一個傷害性、一個好神秘嘅感覺，加上好多金屬、好多鏈，表達情緒枷鎖。」
展覽入面仲有其他作品。
Gin Lee又解釋咗作品中一大一細嘅手嘅含意，仲指當中有一個小心思喺入面：「表達兩個人、兩段關係，中間有條鏈連住，兩個心其實係連埋一齊，但中間有好多誤會、掙扎、磨擦。有一個小心思就係兩隻手各自有半個心，佢哋爭少少就可以修復關係，希望佢哋可以重新連結，兩個半心就變成一個完整嘅心。」今次呢個展覽係希望令更多人留意到情緒勒索問題，而Gin Lee指喺創作過程當入面，自己都有得着。