一直深受觀眾喜愛嘅TVB處境劇《愛.回家之開心速遞》一眾演員,包括 滕麗名 呂慧儀 樊亦敏 許家傑 林淑敏 歐瑞偉 李偉健 陳浚霆 古佩玲 等,呢日一早喺電視城集合,拉大隊準備出發去廣州宣傳。 歐瑞偉 袁文傑 同 何晉樂 喺出發前把握時間練舞,三太樊亦敏同呂慧儀亦帶頭搞氣氛,成班人未出發先興奮。三太以風趣形式介紹佢兩位劇中阿仔陳浚霆同何晉樂,連企喺身邊嘅袁文傑佢都話有機會可以做佢個仔,令人爆笑。
《愛.回家》成員往廣州宣傳,就如齊齊去旅行咁開心
經過4個鐘車程後,喺活動現場見到超過四百位粉絲熱情迎接,大家即刻精神奕奕,同觀眾打招呼及玩遊戲交流,令現場氣氛高漲,個個都迫爆現場感受吓愛回家呢份溫情。阿滕知道活動因有人數限製,有好多Fans只能企喺外圍欣賞,希望下次能容納更多人一齊玩。呂慧儀則知道不同地方都有支持愛回家嘅觀眾,佢哋都想去更多地方同粉絲見面,劇中同呂慧儀演CP嘅張景淳好多謝觀眾愛戴,見到個個咁開心雀躍嘅面孔,令佢好開心。
廣州當地逾400多名Fans在場參與,氣氛非常熱鬧
阿滕同長腳蟹極受大家歡迎
呢日宣傳嘅人腳全部都係成雙成對嘅CP,有夫妻、有情侶、有母子,大家各自展現默契,但最犀利當然係呢對堪稱最強CP啦,KC仲不費吹灰之力抱起Terry,現場反應熱烈。而三太最初都好擔心Fans未必接受佢個角色,但幸好喺現場見到反應好好,令佢放下心頭大石。飾演阿仔嘅何晉樂亦估唔到佢嘅新角色都有咁多人記得。
活動上演員們同現場觀眾玩遊戲兼送禮物,氣氛熱烈,粉絲們嘅熱情,令所有演員開心又激動,現場人人都呼叫送水輝,令許家傑勢不可擋,笑指頂唔順觀眾咁熱情,仲熾熱過出面嘅天氣,令首次到廣州宣傳嘅佢接收到好多愛,滿載而歸。