森美電台節目突傳停播消息 澄清為重榜節目讓路曝學霸乖女去向

森美 阮小儀 同新近加入嘅 梁嘉琪 主持嘅電台節目已播出十多年，每日中午前都為大家帶嚟唔少笑料，不過正值電台台慶前夕，突然有消息傳出佢哋嘅長壽節目「執笠」消息，雖然森美已於節目直播中澄清只係為特備節目讓路，不過星期五佢現身活動時，依舊被傳媒追問停播嘅消息。

森美指出，每逢電台有重大節目推出，各個節目都會有相應嘅更改時段安排，加上今次係電台嘅重點節目，所以就無可避免要作出半個小時嘅遷就，仲多謝大家對《早霸王》嘅關注。至於嘉賓 林家棟 將會參與呢個節目之外，森美又提到仲會有其他殿堂級前輩參與。

森美指節目調動係平常事

佢又笑言要再多謝大家關心自己嘅生計，至於有網民推斷係同最新加入嘅嘉琪表現有關，森美就笑回應話拍檔威力未強橫到呢個地埗咁話喇。

提到佢嘅囡囡早前應考IB(國際文憑大學預科課程)獲得44分佳績成為榜眼，森美就指囡囡正身處台灣旅行，又利用暑假化身補習老師賺零用錢，森美仲為獎勵乖女，決定送上佢賺得嘅同額金錢鼓勵，仲話囡囡對升學已差不多有最好決定，應該會留港升學呀。

一講起囡囡成績極佳佢就非常開心