容祖兒澳門演唱出現小意外 升降台下降不察被絆倒舞台

容祖兒 今年整個7、8月嘅周末都喺澳門開騷，6場演出已經去到末段，今晚就會舉行最後一場。Joey日前先分別欣賞完 郭富城 同韓國女團 (G)I-DLE 嘅演出，仲化身小Fans瘋狂持晒手燈瘋狂投入跟住又唱又跳。

容祖兒再於澳門舉行12場演唱會

吸收完同行嘅表演之後，Joey星期六又變返更后繼續佢嘅澳門演出，台上亦大唱新近推出嘅《One Last Time》身穿熱褲小背心嘅扭動舞姿，不斷散發住性感女人味。不過期間就發生小插曲，表演得興起嘅佢，因未發現升降台下降而被絆倒，尖叫一聲後跌低，身旁舞蹈員即時將佢扶起，幸當時升降台速度緩慢，Joey未有受傷，事後亦已笑聲打圓場，再隨上台查看嘅工作人員返回台下。

星期六一場發生小意外，幸佢未有愛傷

事後網上流傳現場影片，Joey跌倒後坐於升降台邊，而經理人公司事後回應指，幸當時Joey反應快，雖然無礙，不過台下同事都被事件嚇到。事後佢換上透視貼身裙再次上台演出時，亦強調自己冇事，又搞笑指自己有武功根底「食過夜粥」，希望大家避免將醜態上網咁話。

Joey事後仲笑指自己未有受傷，因為自己「食過夜粥」咁話