東東孫耀威三十年首同框合唱 張可頤因撞檔期無奈辭演巨塔

新城電台慶祝33周年嘅台慶音樂會，遨請咗一眾歌手齊集會展演出，好似 陳曉東 孫耀威 羅啟豪 薛家燕 泳兒 張馳豪 鍾柔美 詹天文 林智樂 曾比特 林家謙 陳健安 等等先後獻唱。

東東同Eric都已出道三十年，呢日終於首度同框合唱《那誰》，唔單止觀眾好驚喜，佢哋兩位都覺得好新鮮，Eric亦話非常開心同東東咁多年來，都繼續從事自己熱愛嘅工作，希望可以憑住呢團火，一齊唱到八十歲。

入行多年嘅陳曉東同孫耀威今次竟係首次合作

而一班新生代歌手Aska、Yumi、Windy呢晚都使出青春本錢又唱又跳，啱啱喺泰國拍完MV嘅Aska，就話呢次拍攝過程好開心，導演亦都比咗好多空間去發揮，所以佢都希望大家盡情期待。而同樣都係啱啱喺泰國旅行返港嘅Felix，就話呢次旅行做足防曬措施，雖然同Aska同時喺當地，但可惜緣慳一面未能相聚。

幾位《聲夢》成員呢日都有演出

至於之前一直未決定好升學路向嘅Yumi，亦終於有定案，佢話自己因為DSE成績未如理想，所以最後選擇咗去HKU SPACE修讀商科，佢表示自己都有其他學校Offer，但係都無去接受，因為佢話想花多一兩年時間，向自己心儀嘅路向進發。

至於Windy啱啱去完美國旅行，期間佢都有參觀之前取錄咗佢嘅伯克利音樂學院，Windy話之前有傳佢呢個學位係有條件取錄，但係呢日佢就澄請自己係獲直接錄取。佢話呢次踏足過呢間著名音樂學院後，自己真係好鐘意，所以會考慮喺廣州讀完書後，再赴美國留學。

首次同VSing合作嘅羅啟豪，呢晚亦都同佢哋合唱咗幾首歌，Ramon都覺得好新鮮。至於好耐無喺香港露面嘅張可頤，呢晚上台就唔係大開金口，而係分享佢嘅人生觀，Maggie話再次踏上舞台嘅感覺好正，問到佢之前突然辭演新劇《巨塔之后》，Maggie就話因為劇集延遲咗開拍，加上自己之後又要開戲，所以佢只好無奈辭演，佢表示稍後都會多啲留港拍戲。早上被周啟生叫廢青嘅林家謙，呢晚演出心情未受影響，家謙話佢會尊重前輩嘅意見，問到佢覺唔覺自己係廢青?佢就話自己的確有一種耍廢嘅性格。

張可頤回應辭演《巨塔之后》嘅原因
林家謙體面回應被指「廢青」評論