GULF騷廣東話冧粉絲 真誠分享人生願望清單

泰國男星GULF KANAWUT嘅香港見面會日前圓滿落幕，呢次亦係GULF相隔一年多後再同香港粉絲見面，所以呢晚佢都相當識做，無論喺唱、跳、演等各個環節以及豐富嘅粉絲福利，都令現場觀眾完全陷入GULF魅力當中！ 

Gulf事隔年多後再來港舉行Fans見面會

GULF先以一首《Why you so serious》 為演出揭開序幕，又大騷廣東話：「多謝」、「大家好，我愛你」向大家打招呼，同時亦分享再度來港嘅心情。主持更為台下粉絲謀福利，要GULF即場錄廣東話「早晨、早安」、「晚安、早抖」及「Have a good dream」，務求粉絲日日聽到GULF嘅聲音。而GULF都好識做，喺抽取「粉絲Message Box」環節，時，佢更向台下一名生日粉絲祝賀「Happy Birthday」，盡顯細心一面。 

佢唔止以廣東話同大家打招呼，仲為其中一位幸運Fans慶祝生日

GULF喺活動上亦同粉絲們分享願望，表示首個願望係帶父母去瑞士旅行，因為瑞士一直係兩老夢想最想去嘅國家。另外，佢亦想為愛貓搵另一半組織家庭，但又笑言已為貓貓絕育！至於第三個願望，就係想開一個全男班派對，以及想擁有一個屬於自己嘅足球場，因為他喜歡踢波。

最後，原本想要一對孖胎嘅佢，基於男或女小朋友佢都一樣鍾意，所以決定想擁有一對龍鳳胎比較好。 GULF喺遊戲環節亦大派福利，其中包括由大會挑選十位觀眾，並且二人一組，其中一位需蒙上眼罩，另一位則需要作方向指示，協助隊友搵到GULF為止，然後將帽戴喺佢個頭先係勝出，勝出者可以同GULF一對一合照，令其他觀眾羡慕不已！

佢仲透露希望他日可以有一對龍鳳胎子女

 見面會來到尾聲部份，粉絲們特意為偶像準備應援影片，並全場舉起特意製造嘅足球氣球，以及送上設計成足球嘅精美蛋糕，令GULF大爲感動。爲咗留下同香港粉絲嘅美好回憶，GULF同全場觀眾進行大合照，並再次感謝粉絲們嘅支持同愛護，承諾以後創作更多好嘅音樂作品，一定會經常嚟香港，亦期望將來可以去更多地方同粉絲見面。 最後，全場舉起「大心心」手勢，以展示對GULF嘅支持，為是見面會劃上完美句號！