演藝人協會學校巡迴教減壓 古仔返母校被爆係排球健將

演藝人協會趁新學年開始，重啟School Tour，呢日會長 古天樂 就同副會長 錢嘉樂 仲有一眾理事 張繼聰 周家怡 小肥 岑珈其 游學修 趙善恆 同 J.Arie 仲有嘉賓 JW王灝兒 同樂隊 ToNick 出動，仲以古仔母校迦密中學作為第一站，貼身關注近年廣受社會注視嘅學生情緒問題。

演協School Tour首站到訪會長古仔母校
古仔分享事隔多年重返母校，指回憶起唔少過往校園點滴，而現任迦密中學校長何玉芬博士╴仲係大佢兩屆嘅師姐，佢又語重心長向在座同學分享減壓心得：「有三樣嘢好重要，首先分數唔代表一切，第二，千祈唔好比較，第三，唔好轉牛角尖，遇到問題要同老師、同學講，講完仲有咩就搵我哋啦。」
古仔除咗同現場同學分享減壓方法，校長何玉芬博士更係佢早兩屆師姐。

而古仔就學時嘅李步正校長亦拍片感激佢對母校同學支持，而當年佢嘅同屆同學鄭名輝，仲分享指古天樂當年只係「第二靚仔」，最靚仔嘅另有其人，另一同屆同學就大爆古仔原來係排球健將：「我哋最鍾意一齊打排球，期間有位同學好似『技安』，古生好保護我哋，我哋好鍾意殺波，古生會幫助我哋殺波。」
古仔仲被舊同學大爆當年校園趣事

呢日各位嘉賓都有分享減壓心得，呼籲同學好好控制情緒，張繼聰話：「中學時鍾意打籃球，可以鍛練好球技，又有女同學望，亦會識到好朋友。」而周家怡就指：「讀書時冇School Tour，就算有壓力都唔知點搞，出嚟做嘢多咗壓力，呢個世界個時鐘係唔會停，但壓力總是會過，唔好去刻意諗。」而JW、小肥就認為可以透過自己專長建立信心，遇到壓力同負面情緒，會向身邊人傾訴。
佢哋亦同同學仔玩遊戲

至於岑珈其同游學修，就同現場同學大玩遊戲《口試王》令笑聲不絕，JW、小肥、J.Arie同樂隊ToNick亦分別獻唱多首歌曲，古天樂壓更軸開口獻唱《男朋友》，為演協首站School Tour劃上完美句號。

古天樂開金口唱歌，一班嘉賓乘機瘋狂自拍