周家怡抽閃卡一擊即中方中信 即場求簽名獲「方中Sir」真跡

英皇娛樂早前開設期間限定概念店，店內供顧客抽選嘅一眾藝人同高層閃卡仲掀起話題，自上月店鋪開幕，唔少藝人都已現身，呢日 方中信 周家怡 同 李靖筠 就突襲現場，吸引逾百人求簽名同合照，方中Sir仲親自簽低「Sir」字大名。

方中信、周家怡同李靖筠現身限定概念店玩埋一份
佢哋呢日雖然以嘉賓身份出現，不過就好似客人一樣咁好奇，先影四格相、又抽扭蛋同閃卡，家怡更一擊即中抽到方中信閃卡，興奮得向對方大叫：「哎吔！我抽到你呀！我贏咗啦！」仲即時向方中信索簽名，非常搞笑。
仲叫方中信改簽方中Sir，非常搞笑

之後佢哋仲自掏腰包買T恤支持，又到打卡牆簽名，家怡仲靈機一觸，提議方中信喺Q版小卡簽「方中SIR」，仲上網搵當年《新紮師妹》嘅經典「SIR」字寫法，方中信亦望住截圖照抄。現場圍觀fans即一擁而上要求佢簽「方中SIR」，仍亦有求必應逐一簽名。
兩女又玩又買，呢日滿載而歸

事後方中信仲笑指自己首次寫「SIR」「字」：「好難寫呀，不過見到大家咁開心，徇眾要求，同大家開心吓啦。筆劃有啲多同複雜，簽頭嗰幾個都要望住張相，之後簽熟咗都ok嘅，哈哈。」

之後方中信仲一直為大家簽名合照

「方中Sir」出自楊千嬅同許紹雄等演出嘅電影《新紮師妹》