《破．地獄》獲邀出席夏威夷電影節 衛詩雅遇上從影以來最痛角色

由黃子華、許冠文、衛詩雅、朱栢康、周家怡、秦沛、金燕玲、韋羅莎、梁雍婷、白只、鍾雪瑩等演出嘅新戲《破．地獄》，獲選為夏威夷國際電影節參展電影，而導演陳茂賢同衛詩雅，將於下月親赴夏威夷同當地觀眾見面，佢哋收到消息後都好興奮，導演陳茂賢指：「《破．地獄》除咗係一部講述香港殯儀行業嘅電影，亦係香港非物質文化遺產，係好『香港』嘅電影，作為香港導演，能夠帶住香港電影比外國觀眾欣賞已經好開心，亦好感恩夏威夷國際電影節對《破．地獄》嘅肯定。」
朱栢康、導演陳茂賢、黃子華、駱振偉及衛詩雅為金燕玲慶祝生日。
而衛詩雅亦都好期待：「《破．地獄》對我嚟講，可以話係一部階段性嘅作品，文玥呢個角色睇起嚟心事重重，但佢看待家庭比自己嚟得更重要，因此每一場戲都充滿矛盾同掙扎，戲𥚃戲外都為咗呢個角色喊咗唔少眼淚。好開心外地影展對呢部電影感興趣，自己亦好期待同外地觀眾近距離交流。」

衛詩雅同金燕玲。
電影開拍首天，三位演員金燕玲、黃子華、衛詩雅難得同場演出，彼此互相交流之餘，詩雅更情感大爆發，演繹咗一場令身邊工作人員都動容嘅戲份。詩雅飾演一位救護人員，手到拿來為金姐量血壓、檢查身體等簡單動作，而正式埋位前導演亦都同幾位演員講解拍攝嘅場口。子華同金姐先嚟一場二人喺茶餐廳門口閒聊時，講到內心深處嘅話題，彼此有所感觸，而路經茶餐廳探望金姐嘅詩雅，亦同子華點頭打招呼，睇落簡單嘅一場戲充滿人情味，三人喺埋位前卻各自培養情緒非常專業。拍至深夜時分，導演仲帶頭為生日嘅金姐送上生日蛋糕賀壽，對於突如其來嘅驚喜，金姐話：「 我基本上就好少慶祝生日，啱啱導演話一齊試戲，但冇我份，我都覺得奇怪 ，原來要比我驚喜。其實往年嘅生日，我多數同朋友食餐飯、打場麻雀慶祝，都呢個年紀，費事提醒自己咁大年紀。」

衛詩雅指呢次角色係自己演過最難嘅一個角色。
雖然呢個場口用咗一晚拍攝，金姐嘅戲份由頭帶到落尾，但金姐只要有時間就會同導演以及子華研究劇本角色，加上老友秦沛特地來探班，所以渡過充實嘅一晚。而詩雅亦為呢晚搶救金姐重頭戲獨坐一旁培養感情，面對兩位影帝影后級人馬不容有失。喺拍攝搶救嘅過程中，詩雅情緒爆發，聲淚俱下投入演出。佢情難自禁咁講：「cut機之後，一時間情緒真係難以平復，因為戲中同金姐情如母女，而私底下我們嘅感情因合作過《不日成婚2》有一定默契，所以情緒上投入得更深。」被問到今次角色所經歷嘅痛係唔係最深刻？詩雅坦言：「今次演出經歷，確實令自己有一種難以平復心情嘅感覺，入戲好深，係從影以來最痛嘅一個角色。對手金姐、導演和編劇比我一次很好的體驗，而且難得一次過同金姐、子華哥三人同場，同兩位影帝影后成功偷師。」

秦沛特地嚟探班。