ANSONBEAN推出處男專輯 全天候谷肌打造完美Body

跳唱歌手ANSONBEAN最近推出首張個人專輯《ONE DANCE》，唱片封面以熊熊烈火為背景，寓意蛻變成長，佢更半裸上陣大曬爆肌身型。拍攝開始前，ANSONBEAN同教練David進行密集式谷肌訓練，以保持最佳狀態，現場瞬間變咗流動健身室，佢話：「今年嘅目標係希望有最好嘅身形，食嘢盡量似返原始人，食多啲whole food（原形食物），咁係會最健康。」

ANSONBEAN為拍攝處男專輯封面狂操
新碟靚相以「火」為概念，微弱嘅火苗燃燒至熊熊烈火，象徵住ANSONBEAN嘅蛻變經過，佢話：「一個人由好內向、唔夠膽嘗試，去到Get Wild，就好似火咁不斷燒，最終搵到平衡同埋真正嘅自己。」
要操到一身咁靚嘅肌肉同線條一啲都唔簡單

拍攝由小規模嘅火燒木凳開始，ANSONBEAN解釋木凳代表住社會嘅規限同外界對自己嘅期望，燃燒過程象徵尋覓經過。他話：「搵緊一個平衡，點樣做到自己想做嘅嘢，同時又平衡到大家對我嘅期望。」團隊隨即捉緊時間，黃昏時拍攝短暫又夢幻嘅Magic Hour，佢表示呢個代表「迷失」，開始思考人生嘅下一步。接住，背景亦由火燒木凳、變成火燒木枱、櫃，梳化等等，全部嘅道具同時燃燒。當火燒得最猛烈時，ANSONBEAN更脫去背心曬出6嚿腹肌，寓意「變身」成全新嘅自己。

拍攝前佢早早就開始為一身強勁肌肉操練