前港姐陳倩揚開齋攻影壇 加國拍戲演譚耀文前妻做足功課

前港姐亞軍陳倩揚2022年宣布移居加拿大，近年都係專注KOL事業，日前佢圓夢重返校園修讀媒體廣播與製作，相隔20年再上畢業禮舞台攞證書，最近佢亦有新機會，相隔三年再演戲，參演一部多倫多取景嘅新片《今天應該很高興》。

陳倩揚戲中飾演譚耀文前妻。
一眾演員於28號喺第一組拍攝場景進行開鏡拜神儀式，有份演出嘅嘅譚耀文、楊詩敏、同監製徐寶華等都有現身，倩揚呢次演譚耀文嘅前妻，佢表示非常榮幸被邀試鏡，一星期後知到獲得角色一刻相當興奮，更把握時間準備同投入角色，知道即將與資深演員演對手戲，事前佢都認真做功課，因對上一次參與電視劇拍攝已經係3年前，收劇本一刻經已好雀躍！

劇組日前進行開鏡拜神。
電影係監製徐寶華根據多倫多華人社區真實故事改編，雖然大部分起用香港演員，但安排、策劃、幕後團隊都係用多倫多班底，所以演員都係按加拿大演藝人工會規矩運作，相信對於香港演員黎講都係好新鮮嘅體驗。

陳倩揚同蝦頭楊詩敏。