網傳劉家傑病逝享年82歲 其節目《英語一分鐘》成80後集體回憶

曾任新聞主播同節目主持嘅劉家傑，今日（29日）網上驚傳出死訊，據消息指劉家傑於8月22日於加拿大多倫多病逝，享年82歲。雖然維基百科等已有人修改劉家傑離世日期，但消息至今仍未得到證實。
網上已有人修改劉家傑逝世日期。
劉家傑喺語文界以中英俱佳著稱，亦曾係香港中英文權威嘅象徵，而最為7、80後熟識嘅，莫過於係佢主持嘅英文教學節目《英語一分鐘》，唔少觀眾都喺佢身上學到英文嘅發音、用語等。

劉家傑主持嘅《英語一分鐘》係唔少香港人嘅集體回憶。
90年代尾劉家傑移民加拿大，自此亦淡出香港觀眾視線。2010年時，何守信曾向媒體表示曾與劉家傑於多倫多飯敘，並透露對方現居洛杉磯。而喺2021年，劉家傑不時會喺YouTube嘅影片下留言同網民交流，而同年佢亦有開通Facebook，並於22年喺FB出post，批評英國《BBC》新聞字幕用詞奇怪。