鄭伊健直認與蒙嘉慧返港避風災 陳慧珊花8年修讀敎育博士學位

鄭伊健 張文傑 同 楊偲泳 呢日型格現身汽車陣列中心為新車進行揭幕儀式，久未公開露面嘅 陳慧珊 為活動擔任司儀。伊健同German都係愛車之人，有幸一齊見證呢架越野王率先登場，唔單止令佢哋心癢癢，仲有唔少共同話題。伊健話現時買車同過往唔同，以往會任意想換就換，但現在會用到唔得先考慮換車。

伊健指太太蒙嘉慧近日陪佢喺香港工作
伊健早前到台灣開騷，應邀上小S嘅綜藝節目作客宣傳，點知小S一見到伊健就飛擒大咬又攬又挑逗，搞到伊健尷尬又怕醜唔敢郁，驚起上嚟仲用手遮住面部，場面搞笑。伊健直認當時好尷尬，但明白互相文化不同，事實上幾好玩，但就可以減少親密接觸。又大讚小S其實係位好專業嘅主持人，除咗想節目多人睇，亦想盡辦法幫佢宣傳，只係選用咗個比較特別嘅手法。

伊健同老婆蒙嘉慧近年經常會喺日本四圍去，阿Yo仲喺福岡經營地產業務，不過早前日本大地震預警，兩夫妻被指返港避難。對此伊健直認阿Yo喺福岡嘅地產生意受到天氣影響，仲話大家有留意消息都知唔單只日本，其實歐洲甚至香港等都有呢個情況出現，之前黃大仙都水浸，更叮囑大家天氣反常要加倍小心。
至於香港同日本居住比例分配？伊健就強調自己仍然在香港居住，只係老婆喺日本工作，不時會飛去日本探望，現時他在港工作，阿Yo亦回港陪伴，又話自己係過住旅居生活，去到日本起碼有個地方可以擺行李落腳，呢點最重要。
近年攻讀博士學位嘅陳慧珊呢日擔任活動主持

陳慧珊相隔一段時間喺香港公開露面，不過今次就換個身份挑戰做司儀，見佢同嘉賓互動流暢，完全勝任。Flora花8年時間修讀教育博士學位，下月通過最後階段就會完成，佢自己都好緊張又興奮，因為畢業後盼做更多有意對嘅事。舊拍檔林保怡回巢TVB拍攝劇集《刑偵12》，令觀眾期待，至於Flora會唔會心動想回巢拍劇？佢就大賣關子話咩都有可能。