錢國偉電影遺作正式放映 遺孀陳宛蔚感激好友出心出力

已故TVB金牌監製錢國偉生前執導一套講兄弟情嘅電影遺作，由拍攝至今相隔六年終於上映，雖然Wilson離開人世，但人情味依然。電影舉行好友聚會場，Wilson遺孀陳宛蔚帶埋囡囡Abby現身，而Wilson一班生前好友曾志偉、錢嘉樂、黎諾懿夫婦、林盛斌、石修父子同埋一班味之天使都嚟到捧場，湊成Wilson生前最愛嘅熱鬧場面。

錢國偉遺孀陳宛蔚同當年一班節目天使合體
電影主演嘅林曉峰同張文傑都重提故友都不忘搞笑同感觸，阿Lo話當初拍攝時同Wilson好多磨擦，不時吵架，佢笑指襯Wilson唔喺度，所以點講都得。German話當時初初由幕後轉做幕前，多謝導演畀機會新人。阿Lo又爆笑指當日見到German誤以為係泰國演員，之後Wilson澄清係香港演員。
林曉峰亦現身支持已故老友遺作

由於Wilson離世後，電影尚有未拍攝戲份同後期製作未完成，幸得一班兄弟幫忙，先促成電影誕生，陳宛蔚都對一班好友付出都作無言感激，戲中再見到Wilson客串嘅蹤影，佢都萬般滋味在心頭，心情特別感觸，佢話拍攝電影時，佢剛剛生完囡囡，仲記得出院第二日，Wilson就飛到泰國拍攝，而整個過程都遇上唔少波折，不過佢知道Wilson好鍾意拍戲兼且能組成一班兄弟拍攝，所以幾困難都係享受。
Caldina感謝各界出心出力協助完成電影

眨吓眼，Wilson已經離開咗四年幾，陳宛蔚獨力苦養女兒，走過唔少艱苦歷程，好彩有囡囡同身邊朋友嘅愛，令佢可以一步一步撐落去，佢話身邊好多親友愛鍚佢母女，呢啲都係Wilson生前對人好嘅關係。佢又表示要堅強先可以湊大囡囡。現時喺TVB擔任藝人經理人職務，佢解釋TVB係佢畢業後參選港姐嘅地方，又係佢同Wilson認識嘅地方，可以喺一個熟悉地方再開始，令佢更有安全感。

曾志偉同錢嘉樂一樣都係Wilson好友

生前曾為大量節目同演唱會擔任骨幹製作崗位嘅Wilson，2020年因癌症離世