劉德華期待四大天王合作開騷 低調放閃形容太太在場感安心

劉德華 世界巡迴演唱會香港站日前圓滿落幕，嚟到尾場第20場，華仔仍然落力表演，又不時向歌迷大叫「我愛你」以表心意，真係好Sweet！不過華仔可能唔捨得歌迷以及一班台前幕後工作人員，所以臨近尾聲時都有啲眼濕濕。最後華仔亦指揮全場歌迷同佢一齊大合唱，令佢難忘又開心。

劉德華完成整個巡迴演唱會72場演出
華仔為確保自己身體健康，所以喺72場巡演期間，佢都一直keep住戴口罩，以免生病。終於完成香港呢20場騷可以除低口罩見大家，華仔都覺得輕鬆曬，亦好感恩一切可以順行進行。華仔就話，佢只為自己表現打70分，而佢聽到在場傳媒講：「歷年來最好嘅表演嘅一次演唱會。」時，都表現得好怕醜。至於講到會唔會做Part 2以及對下個騷有咩諗法，華仔就話自己未有諗法，但一個主題唔會做太多次，所以唔會再開Part 2。

而華仔亦表示對啟德場館有興趣，不過要諗到下個騷想點做，先會再去申請，亦有在場傳媒提議四大天王一齊開騷，華仔聽到後都兩眼放光，話自己都好想做啊！
呢日提到四大天王同台演出，華仔似乎都非常感興趣

呢晚除咗錢嘉樂夫婦捧場外，華仔太太及女兒都有現身，華仔笑指二人睇足72場，而囡囡對自己嘅表現亦有好多評價，甚至試過話佢跳錯舞添！而華仔喺呢個主題巡演亦發生過舞台小意外，令大家睇到都覺得牙煙，所以喺香港站都有做出舞台動作刪改調整，以免家人、歌迷擔心。華仔仲好低調放閃，話太太在場唔會令佢有壓力，反而更加安心。講到農曆年打算點過，華仔就話難得一家人放假，都一齊出埠旅遊啊！