五月天新加坡巡唱 與孫燕姿合唱掀高潮

五月天 唱完6場跨年演唱會之後，踏入2025年巡迴演唱會就繼續出發，去到新加坡繼續唱，仲邀請好耐冇見嘅重量級嘉賓 孫燕姿 同台合唱《温柔》，令大家都相當驚喜。剩係聽燕姿唱一首歌當然唔夠喉啦，阿信好明白歌迷嘅心情，即場一句一句教燕姿唱五月天嘅新歌《任性》。

孫燕姿於主場新加坡現身五月天嘅演出

令現場觀眾都非常驚喜
新加坡場嘅驚喜嘉賓唔止一位，喺點歌環節阿信就發現台下有個熟悉嘅面孔，佢就係冠佑嘅囡囡小玫瑰，而家喺新加坡讀書嘅小玫瑰，仲上台向爸爸送飛吻，場面溫馨，其實小玫瑰去年已經正式出道推出自己嘅新歌，呢日喺全場上萬名觀眾面前獻唱《天黑黑》都毫不怯場，非常有大將之風，阿信仲好貼心咁向新加坡嘅粉絲講，希望佢哋幫忙照顧下小玫瑰呀。

正於當地讀書嘅冠佑嘅囡囡小玫瑰亦都有上台