五月天尾場即興邀歌迷玩遊戲 阿信與身障五迷互動溫馨感人

五月天 25周年巡唱桃園站6場圓滿落幕，五子喺呢6場演唱會完全放開嚟玩，先係有瑪莎走近觀眾，不時突襲看台區，喺第5場阿信更喺瑪莎嘅激將法之下「華服出巡」，走到看台同一位身障五迷互動點歌。 

五月天嘅銀禧演唱會正式完成

到咗尾場佢哋就玩得更癲，阿信更喺點歌環節揀咗一位身穿大熱韓劇《魷魚遊戲》綠色運動服、攬住劇中「英熙娃娃」抱枕嘅歌迷，即場玩「一二三木頭人」遊戲，阿信笑言：「我們看台區都安排好狙擊手，一人一槍你會變肉醬。」又定下遊戲規則，只要歌迷勝出就可以得到一張五月天大巨蛋演唱會票，但輸咗就會立刻退票趕人離場。

最後歌迷不但勝出奪得獎品，更成功點歌，令阿信演唱有「五月天上古四大神曲」之稱嘅《虛弱》，呢首歌喺先前場次其實亦曾被歌迷點過，但都被阿信拒絕，可以呢位歌迷真係幸運到好似贏到456億一樣啊！ 阿信不時會喺網上同歌迷互動，更成日扮呷醋話五迷「爬牆」瞞住佢鍾意其他人，呢晚點歌環節就有位歌迷「自首」，向五子表示自己係由Energy粉絲變成五迷17年。雖然阿信笑指呢位歌迷係「叛徒」，但佢亦開心演唱Energy舞曲《星期五晚上》，亦表示感謝大家對Energy支持。

阿信亦到觀眾席同一眾歌迷互動

 睇五月天演唱會必不可少就係高舉佢地專屬嘅互動螢光棒，而五子喺25周年巡演中亦經常叫呢次螢光棒做「魔法棒」。阿信喺呢晚亦有走近人群，同一位手部截肢、需要將螢光棒綁好固定嘅殘障五迷互動，阿信暖心搭住呢位五迷膀頭，表示：「第一眼我沒有發現有什麼特別，但第二眼我發現你的螢光棒是全場裡面握得最牢的。」亦鼓勵對方高舉螢光棒令全場望見，而喺阿信感激呢位五迷既時候，對方對阿信講：「五月天是我的魔法棒。」呢一幕相當溫馨催淚。
歌迷嘅正面同勇氣令人非常感動

而喺五子唱到最後Encore部分，喺演唱《垃圾車》呢首歌時，阿信亦走近同一位白髮婆婆互動，大半首歌都握緊對方演唱，所以完結演唱會後，唔少五迷都重提阿信曾經喺網上講過嘅：「我不是遠在天邊的偶像，而是聽你們說話的阿信。」認為五月天各人都將呢句話更具象化。