張惠妹 五月天台北桃園迎元旦 羅志祥高雄演出變面目全非

張惠妹喺台北大巨蛋跨年演唱會嚟到除夕夜，亦係台北站演唱會嘅最後一場，阿妹喺台上用盡全力，帶領全場四萬名觀眾由2024情緒高漲至2025，而全場觀眾亦拋出七色彩帶，令大巨蛋變成一片彩虹海，場面非常壯觀。

張惠妹除夕於大巨蛋與歌迷一齊跨年

大巨蛋今次亦成功通過阿妹嘅震動測試，當四萬人一齊跳唱《三天三夜》，唱到中段，阿妹大叫「大巨蛋，跳起來！」現場觀眾更加係忘我狂跳。

至於桃園就有五月天陪大家跨年，倒數前夕，主音阿信就向全場歌迷感性告白，仲為觀眾送嚟新年賀禮，首次獻唱新歌《任性》，踏入元旦一刻，場館更發放大量煙花，畫面震撼。

五月天就於桃園同歌迷度過，更公開獻唱新歌

高雄嘅倒數演唱會就有小豬羅志祥演出，當倒數踏入2025年，小豬就以勁歌引領全場起跳，佢仲同觀眾互動玩遊戲互掟Cream，結果被掟至面目全非，佢仲拋下偶包喺台上洗頭。

小豬就喺高雄同Fans狂歡掟Cream