五月天元旦開騷再受雨神來襲 香港五迷為點歌疑消費災民掀罵戰

五月天嘅6場巡迴演唱會台灣桃園站一眨眼已經完成一半，上年五月天幾乎喺唔同地方開巡演都會遇上暴雨或者喺突如其來嘅大雨中收尾，踏入2025年第一日，五子仍然被雨神「照顧」，喺元旦場又再度遇上大雨。
 五月天開騷又落大雨。
之但係再大嘅風雨都淋唔熄在場兩萬五千位五迷嘅熱情，五子更相當瀟灑陪大家一齊淋雨，而去到點歌環節，瑪莎更走近喺遠方嘅企位區域同小五迷互動，先係關心對方：「你到現在腿會不會痠？會不會覺得冷、會不會覺得濕？」小五迷淡定回應：「不會。」後，瑪莎又發揮搞笑本色，問對方：「想要聽阿信阿伯唱什麼歌？」令全場大笑，最後小五迷點歌《為你寫下這首情歌》成功，更喺阿信邀請下率先開唱。事後小五迷嘅媽媽亦喺社交平台分享囝囝同偶像互動嘅喜悅，以及感激身邊一班互不相識嘅五迷，喺點歌環節時瘋狂吸引瑪莎成功，令囝囝可以一圓心願。
 怪獸阿信
雖然大家經常可以五月天演唱會嘅點歌環節聽到唔同歌迷分享故事，或者欣賞到佢地有趣嘅點歌道具，之但係元旦場就因為有兩位香港五迷，為成功吸引五子注意點歌成功，而假扮花蓮人，有消費地震災戶之嫌嘅事件，唔只喺現場被冠佑問：「你們是花蓮人嗎？」搞到口窒窒，更被阿信問：「為什麼今天拿著這個牌子騙冠佑？」，搞到演唱會完場後一眾台灣、香港五迷都嬲爆喺網上嘈足兩日。雖然兩位當事人喺網上解釋，自己只係「太緊張」，所以先會喺現場答阿信：「因為我們要去花蓮，之前寫了很多次都沒騙到。」，但仍然有唔少人認為行為不妥，唔可以因為想吸引偶像而喺災民傷痛上嬉笑玩樂。
石頭 及 冠佑