吳宗憲稱已分配好遺產 透露跨年夜周杰倫主動視像拜年

台灣藝人吳宗憲呢日現身香港，以嘉賓身份同陳山聰、胡諾言、林盛斌等出席一個直播平台舉辦嘅頒獎典禮。

憲哥吳宗憲日前來港出席活動
憲哥除咗係台灣綜藝天王外，佢仲跨界經營過唔少副業，事業版圖越做越大，不過憲哥就話而家自己嘅工作心態已經有所不同，因為藝能界嘅範圍比較細，但係喺商場上做生意就會服務到更多嘅人，所以往後佢可能會轉去呢邊，不過憲哥話因為表演可以帶畀人歡樂，睇嘅人快樂，佢內心就開心，而呢個係佢主要嘅人生目的：「當你不需要為了要賺錢在工作的時候，你就知道你的工作有多快樂。」憲哥又指自己差唔多50歲嗰年，就已經將自己處理好遺產嘅分配，佢笑言而家係「一人飽保全家溫飽」嘅狀態。
唔止提到已分配好遺產，仲指已同周杰倫破冰

之前屢次傳出憲哥同周杰倫不和嘅消息，不過呢日憲哥就透露跨年當晚，佢做完直播後周董有視訊同佢拜年，當時對方仲叫埋太太昆凌一齊過嚟，令憲哥相當開心：「我們本來就沒有什麼，我很愛他們，每一個孩子，我這個長輩做得真好，對不對？」憲哥指最初周董擔任佢嘅助理，幫佢整理音樂等，轉眼間就已經24年喇，但佢冇任何改變，佢依舊都係吳宗憲。

早前喺廣州舉行完入行30周年音樂會嘅陳山聰，就話自己未夠喉，不過問到會唔會喺香港開騷？佢就話要睇下主辦單位，但就透露會舉行part 2呀。

日前圓夢開騷嘅山聰，呢日就提到將會再開Part 2
仲有唔夠一個月就到農曆新年，胡仔透露將會帶同家人去哈爾濱度歲，佢指自己拍過唔少旅遊節目去過唔少地方，但唯獨哈爾濱佢就未去過，所以就想帶埋小朋友去當地滑雪感受一下。
胡仔則預告會同家人到東北度歲

口才了得嘅阿Bob，自言對直播帶貨並唔擅長，仲話叫佢食碗麵畀反應佢係OK嘅，但要佢好似直播主咁不斷介紹同講，佢就話自己未夠斤両呀。

阿Bob口齒伶俐反應快，但係就自謙直播帶貨搞唔掂喎