丁子朗歷《超星團》洗禮預告推個人歌曲 伍允龍型格打扮被讚似手辦公仔

伍允龍、余香凝（Jennifer）、丁子朗、孔德賢（Danny）呢日現身一個時尚活動。最近考電單車牌一Take Pass嘅Danny心情大好，佢將一切歸功於教練教得好，又透露十月將會挑戰考拖尾貨櫃車車牌，認真厲害！而丁丁自從經歷《亞洲超星團》洗禮後，對唱歌更為熱愛，佢亦向大家預告即將推出個人歌曲，並邀請余宗遙負責Mixing工作，希望大家多多期待。

丁丁預告即將推出個人歌曲。
Philip早前喺社交平台公佈外婆喺睡夢中離世嘅消息，亦分享兩張合照，懷念婆孫之情。雖然Philip遺憾未能送婆婆最後一程，但佢相信婆婆會喺天上睇住自己，Philip承諾會繼續努力工作。
伍允龍外婆早前於睡夢中離世。
而Philip一向鮮有出席時尚活動，呢次難得睇show，佢都打扮得特別型仔，令Fans讚佢靚仔到同手辦模型公仔一樣。Philip笑言自己平時打扮得比較悠閒，反而老友吳建豪比較注重配搭。講到工作，Philip除咗要為即將上映嘅新戲《武替道》進行宣傳，亦要做代表飛往海外多個地方參與電影節，為有份主演嘅電影《九龍城寨之圍城》宣傳，佢透露目前忙於投入自己製作嘅電影《無名火》後期製作，敬請各位粉絲多多期待。
Jennifer自奪得金像奬影后後，工作忙過不停。
Jennifer自奪得金像奬影后後，工作忙過不停。早前佢終於得閒，可以同家人及同事齊齊遊泰國，又體驗穿著泰服，玩得非常盡興，亦好感謝大家幫佢輪流湊小朋友，令佢有時間同先生二人世界。