朱晨麗獲鄔友正讚身材恰到好處 擇偶基本條件要做柴可夫

朱晨麗呢日以露肩開叉長裙現身一個汽車活動，朱朱雖然對車好有研究，但原來佢一直未考車牌，雖然早喺十幾年前曾經計劃過，最終太忙不了了之。雖然係咁，但朱朱擇偶視呢個係基本條件，認為駕車係男性必備技能，仲話冇車牌嘅追求者一定會被扣分，想追朱朱嘅男士心動不如行動先。

朱晨麗話追求者要有車牌。

朱朱啱啱忙完拍攝內地網劇，本來有意去旅行叉電，因為佢每年都會到泰國旅遊，但今年還未出發，身邊嘅好友各自各忙，要齊腳出發有啲難度，令佢好掛住按摩、大擦美食嘅感覺。

鄔友正讚朱晨麗樣甜身材好。

翁嘉穗老公鄔友正近日活躍於社交平台，不時發文同網友互動，日前佢論盡劇集四大美人，而其中一位就係朱朱，鄔生大讚朱朱係「蘇州美女，樣子甜美，Baby Fat襯埋整個身形，恰到好處」；聽到鄔生嘅讚美，朱朱好開心話會更努力Keep住外貌及做好自己，鄔友正更貼出同朱朱嘅合照，十足小粉絲咁。

另外，三位獲得鄔友正點評嘅仲有楊冪及奧斯卡影后Ingrid Bergman、而首席女神之位則係韓星金智媛，「女主角金智媛閉月羞花，沉魚落雁，加埋她的演技，是我見過最美的」，似乎鄔友正好留意各地娛樂圈嘅美女，唔知老婆翁嘉穗又點睇呢？