張天賦展開巡唱首站大馬個唱 即場自製同框合照冧粉絲

張天賦喺7號晚現身馬來西亞舉行當地首個演唱會，為巡迴演唱會揭開序幕，MC同時創下新世代最年輕男歌手踏足雲星劇場舉行個唱嘅紀錄，嚟自各地嘅「賦二代」到嚟捧場見證MC歷史時刻。

MC創下新世代最年輕男歌手踏足雲星劇場舉行個唱嘅紀錄。
MC以型格造型現身舞台，並以自己作曲新作《百英大道》打頭陣，接住獻唱快歌帶動全場氣氛。當MC唱出《記憶棉》、《老派約會之必要》及《小心地滑》等多首代表作，更令「賦二代」忍唔住合唱。

首度喺馬來西亞開騷，MC入鄉隨俗，特別以馬來文多謝馬拉賦二代。
至於全晚最驚喜環節，莫過於MC喺演唱《反對無效》完結時，螢幕上呈現咗一個心形框，一邊係MC本人，另一邊就係隨機挑選現場歌迷，自製同歌迷「同框」機會。首度喺馬來西亞開騷，MC入鄉隨俗，特別以馬來文多謝馬拉賦二代，仲演唱佢第一首國語歌《September with You》，咁啱呢次係MC喺今年九月嘅第一個演出。

各地「賦二代」到嚟捧場見證MC歷史時刻。
演唱會尾聲，MC突然走到台下觀眾席，同粉絲作零距離接觸，掀起全晚高潮，歌迷紛紛同MC揮手擊掌互動。演唱會完結後，觀眾席仍encore聲不斷，一直唔肯離開，喺後台嘅MC特別重返台上進行encore環節，為歌迷獻唱最後一首歌，令演唱會畫上完美句號。